அகத்தியர் சிவநாடி ஜோதிடம்

 

அகத்தியர் சிவநாடி ஜோதிடம்: 

ஓலைச்சுவடிகளில் மறைந்துள்ள 

மெய்மையும்,  புனைவும் 

முத்தமிழ் முனிவரும் முளைத்தெழுந்த புனைவுகளும்

தென்திசை நோக்கி வந்து விந்திய மலையின் செருக்கடக்கி, பொதிகை மலையில் அமர்ந்து முத்தமிழையும் சித்த மருத்துவத்தையும் உலகிற்கு அருளியவர் குறுமுனி அகத்தியர். வாதம், வைத்தியம், மாந்திரீகம், யோகம் எனப் பல பரிமாணங்களில் மானுட சமுதாயத்தை உய்விக்க அவர் ஆற்றிய தொண்டுகள் அளப்பரியவை. இந்த வரிசையில், கோள்களின் நகர்வுகளையும், அவை மனித வாழ்வில் ஏற்படுத்தும் தாக்கங்களையும் விளக்கும் ஜோதிடக் கலைக்கும் அவர் இலக்கணம் வகுத்தார் என்பது மறுக்க முடியாத மெய். ஆனால், இன்று "அகத்தியர் சிவநாடி ஜோதிடம்" என்ற பெயரில் வீதிக்கு வீதி வாசிக்கப்படும் ஓலைச்சுவடிகள் உண்மையில் அந்த மாமுனியால் அருளப்பட்டவை தானா? அல்லது மனிதர்களின் பலவீனங்களை மூலதனமாக்கி உருவாக்கப்பட்ட நுட்பமான உளவியல் தந்திரமா? என்பதை தர்க்க ரீதியாகவும், இலக்கியச் சான்றுகளோடும் இக்கட்டுரை ஆராய்கிறது.

அகத்தியர் அருளியது:  ஜோதிட இலக்கணமே தவிர, தனிமனித நாடியல்ல

அகத்தியர் ஜோதிடக் கலைக்குத் தமது பங்களிப்பைச் செய்துள்ளார். ஆனால், அவர் அருளியவை "ஜோதிடச் சூத்திரங்கள்" (Astrological Principles and Rules). சூரியன் இந்த வீட்டில் இருந்தால் என்ன பலன், சனி பகவான் இந்த வீட்டில் சஞ்சரித்தால் என்ன பலன் என்ற கணித அடிப்படையிலான ஜோதிட விதிகளை மட்டுமே அவர் பாடல்களாகப் பதிவு செய்துள்ளார்.

அதாவது, இது ஒரு மருத்துவ நூலைப் போன்றது. இன்ன நோய்க்கு இன்ன மருந்து எனப் பொதுவான விதியை வகுப்பதே சித்தர்களின் வழக்கம். அதை விடுத்து, உலகில் இனிப் பிறக்கப் போகும் கோடிக்கணக்கான மனிதர்களுக்குத் தனித்தனியாகப் பெயர், பெற்றோர் பெயர், எதிர்காலம் என அனைத்தையும் எழுதி, அதனை பார்வதி தேவியிடம் சிவபெருமான் உரைக்க, அகத்தியர் ஓலைச்சுவடிகளில் பதிவு செய்தார் என்பது முற்றிலும் முரணான, எவ்வித வரலாற்றுச் சான்றும் இல்லாத ஒரு கட்டுகதையாகும்.

பெருவிரல் ரேகையும் 'உங்கள் நாடி கிடைத்துவிட்டது' என்ற நாடகமும்

நாடி ஜோதிடம் பார்க்கச் செல்பவர்களிடம் முதலில் அவர்களின் பெருவிரல் ரேகை பெறப்படுகிறது. "இந்த உலகத்தில் உள்ள மனிதர்களின் ரேகைகளை 108 வகையாகப் பிரிக்கலாம். உங்கள் ரேகைக்குரிய சுவடிக் கட்டை எடுத்து வருகிறோம்" என்று கூறி, ஒரு சுவடிக் கட்டை வாசிப்பார்கள்.

அதில் உள்ள ஓலைகளை ஒவ்வொன்றாகப் படித்து, சில கேள்விகளைக் கேட்பார்கள். "இல்லை" என்று நாம் கூறினால் அடுத்த ஓலைக்குச் செல்வார்கள். இறுதியில் ஒரு ஓலையில் உள்ள தகவல்கள் நமது வாழ்க்கையோடு ஓரளவுக்கு ஒத்துப்போகும்போது, "ஆஹா! உங்கள் நாடி கிடைத்துவிட்டது! அகத்தியர் உங்களுக்காகவே எழுதி வைத்த சுவடி இதுதான்" என்று ஒரு மாயையை உருவாக்குவார்கள்.

உண்மையில் அங்கு நடப்பது என்ன? அங்குப் படிக்கப்படுபவை தனிமனிதனுக்காக எழுதப்பட்ட சுவடிகள் அல்ல. அவை பல நூற்றாண்டுகளுக்கு முன்பு வாழ்ந்த ஜோதிடர்களால் எழுதி வைக்கப்பட்ட "ஜோதிடத் துணுக்குகள்" (Astrological Snippets and Permutations) மட்டுமே. குறிப்பிட்ட கிரக அமைப்பு (Planetary Positions) கொண்டவர்களுக்கு என்னென்ன நடக்கும் என்ற பொதுவான ஜோதிடக் குறிப்புகள் அவை. ஒருவரின் ஜாதகக் கட்டமும், அந்த ஓலையில் உள்ள கிரக அமைப்பும் ஒத்துப்போகும் போது, அது அந்த நபருக்காகவே எழுதப்பட்டது போன்ற ஒரு தோற்றம் (Illusion of Personalization) கட்டமைக்கப்படுகிறது.

பெயர் கூறும் கலை: மெய்ஞானமா? நுட்பமான உளவியலா?

நாடி ஜோதிடத்தின் மிகப்பெரிய ஈர்ப்பே, "என் பெயரையும், என் அப்பா, அம்மா பெயரையும் ஓலையைப் பார்த்து அப்படியே சொல்லிவிட்டார்கள்!" என்பதுதான். இது எப்படிச் சாத்தியம்? இங்குதான் அதிநுட்பமான உளவியலும் (Cold Reading), வினா தொடுக்கும் கலையும் (Art of Interrogation) பயன்படுத்தப்படுகின்றன.

நாடி வாசிப்பவர் எடுத்தவுடன் பெயரைச் சொல்வதில்லை. அவர் நம்மிடம் கேள்விகளாகவே கேட்பார்:

• "உங்கள் பெயர் ஒரு கடவுளின் பெயரா?"
• "பெயரில் நான்கு எழுத்துக்கள் உள்ளதா?"
• "பெயரின் இறுதியில் 'அன்' என்று முடிகிறதா?"
• "அது ஒரு மலையைக் குறிக்கும் தெய்வமா?"

இப்படித் தொடர்ந்து கேள்விகளைக் கேட்டு, பதில் சொல்லும் நபரின் வாயிலிருந்தே மெல்ல மெல்ல எழுத்துக்களை வாங்கி, முழுப் பெயரையும் வாசிப்பவரே கட்டமைப்பார். இறுதியாக, "உன் பெயர் வெங்கடேசன் என்று இந்த ஓலையில் அகத்தியர் எழுதியுள்ளார்" என்று கூறுவார்.

மேலும், மரபான ஜோதிடத்தில் ஒலியியல் (Phonetics) சார்ந்த சில விதிகள் உண்டு. லக்னத்தில் உள்ள நட்சத்திரத்தின் அடிப்படையில் ஒருவரின் பெயரின் முதல் எழுத்து என்னவாக இருக்கும் என்ற விதி உண்டு. அதனையும், இந்த கேள்வி-பதில் உத்தியையும் இணைத்து, மிகவும் சாதுரியமாகப் பெயரை "கண்டுபிடிக்கிறார்களே" தவிர, சுவடியில் எந்த இடத்திலும் "இவன் பெயர் வெங்கடேசன்" என்று நேரடியாக எழுதப்பட்டிருக்காது. இது ஜோதிடத்தை விட, வாசிப்பவரின் மொழி ஆளுமை மற்றும் உளவியல் தந்திரமே ஆகும்.

பாவம் 'காண்டமாக' மாறிய விந்தை: திரிபடைந்த ஜோதிடம்

நாடி ஜோதிடம் என்பது பாரம்பரிய ஜோதிடத்திற்கு அப்பாற்பட்ட ஒரு தெய்வீக ரகசியம் என்று நம்ப வைப்பதற்காகச் செய்யப்பட்ட மிகப்பெரிய தந்திரம் 'சொல் மாற்றம்'.

பராசரர் போன்ற முனிவர்கள் வகுத்தளித்த இந்திய ஜோதிட முறையானது "பன்னிரண்டு பாவங்கள்" (12 Bhavas/Houses) என்ற அடிப்படையிலானது. லக்னம், தனம், தைரியம், சுகம், புத்திர பாவம் என 12 வீடுகள் மனித வாழ்வை நிர்ணயிக்கின்றன. இந்த மரபான ஜோதிடக் கலையை, ஏதோ தனித்துவமான கலை போல் காட்டுவதற்காகச் செய்யப்பட்ட தந்திரமே, "பாவம்" என்ற சொல்லை "காண்டம்" என்று மாற்றியதாகும்.

• ஜோதிடத்தில் 'முதல் பாவம்' (லக்னம் - பொதுவான வாழ்க்கை) என்பதை நாடியில் 'முதல் காண்டம்' (பொதுப் பலன்) என்றார்கள்.
• ஜோதிடத்தில் 'இரண்டாம் பாவம்' (குடும்பம், செல்வம்) என்பதை நாடியில் 'இரண்டாம் காண்டம்' என்றார்கள்.
• ஜோதிடத்தில் 'ஏழாம் பாவம்' (களத்திரம்/திருமணம்) என்பதை நாடியில் 'ஏழாம் காண்டம்' (திருமணப் பலன்) என்றார்கள்.

இதிலிருந்து என்ன தெரிகிறது? பாரம்பரிய ஜோதிடத்தையே சிறுசிறு துணுக்குகளாகப் பிரித்து, அதற்கு "காண்டம்" என்று பெயரிட்டு, அதனை அகத்தியர் பெயரால் வணிகமாக்கி விட்டனர் என்பதே அப்பட்டமான உண்மையாகும்.

இலக்கியச் சான்றுகளின் இன்மையும் தத்துவ முரணும்

"நட்ட கல்லும் பேசுமோ நாதன் உள்ளிருக்கையில்" என்று பாடியவர்கள் சித்தர்கள். பிரபஞ்ச ரகசியங்களை ஆராய்ந்து, மனிதனை பிறவித் தளையிலிருந்து விடுவிப்பதே அவர்களின் இலட்சியம். அப்படிப்பட்ட மாபெரும் ஞானியான அகத்தியர், "நீ நாற்பது வயதில் வீடு கட்டுவாய், உனக்கு இரண்டு குழந்தைகள் பிறக்கும்" என்று உலகியல் சார்ந்த அற்பமான விஷயங்களை கோடிக்கணக்கான மனிதர்களுக்குத் தனித்தனியாக உட்கார்ந்து ஏடுகளில் எழுதிக்கொண்டிருந்தார் என்று கூறுவது, அவரது மெய்ஞானத் தத்துவத்திற்கே செய்யப்படும் பெருத்த அவமதிப்பாகும். மேலும், இப்படி ஒரு நாடி முறை இருந்ததற்கான எந்தவொரு குறிப்பும் சங்க இலக்கியங்களிலோ, பதினெண் சித்தர்களின் மூல நூல்களிலோ எள்ளளவும் இல்லை.

அகத்தியர் வானியலையும், கோள்களின் சஞ்சாரத்தையும் ஆராய்ந்து ஜோதிட இலக்கணம் வகுத்த ஒரு மாபெரும் விஞ்ஞானி. ஆனால், இன்று சந்தைப்படுத்தப்படும் "சிவநாடி ஜோதிடம்" என்பது அவரால் எழுதப்பட்டதல்ல. அது வெறும் "ஜோதிடத் துணுக்குகளின் தொகுப்பு"; 'பாவங்களை' 'காண்டங்களாக' உருமாற்றி, உளவியல் தந்திரங்களைக் கொண்டு பெயர்களை ஊகித்து, 'உங்கள் நாடி கிடைத்துவிட்டது' என்று அரங்கேற்றப்படும் ஒரு கவர்ச்சிகரமான நாடகம்.

இந்த மெய்மையை உணர்ந்து, புனைவுகளைப் புறந்தள்ளி, அகத்தியர் அருளிய மருத்துவத்தையும், யோக மார்க்கத்தையும், தத்துவங்களையும் ஏற்றுப் போற்றுவதே, அந்தப் பொதிகை மாமுனிக்கு நாம் செய்யும் உண்மையான நன்றிக்கடனாகும். தொன்மங்களை அறிவியலின் துணைகொண்டும், தர்க்கத்தின் வழியிலும் அணுகுவதே ஆரோக்கியமான சமுதாயத்திற்கு வழிகாட்டும்.

என்றும் பணிவுடன் 

சசிகுமார் குப்புசாமி