தில்லை ஆருத்ரா தரிசனமும் ஜோதிட சூட்சுமங்களும்

அண்டம் அசைக்கும் ஆடல்வல்லான்

 "வானாகி மண்ணாகி வளியாகி ஒளியாகி..." என்று ஐம்பூதங்களாய் விரிந்து பரந்தவன் ஈசன். பஞ்சபூதத் தலங்களில் 'ஆகாயத் தலம்' என்று போற்றப்படும் சிதம்பரம் தில்லை நடராசர் கோவிலில், மார்கழி மாதத்தில் நடைபெறும் மிக உன்னதமான ஆன்மீகப் பெருவிழாவே 'ஆருத்ரா தரிசனம்' ஆகும். பனிபொழிந்து குளிரூட்டும் மார்கழி மாதத் திருவாதிரை நட்சத்திரத்தில், ஆடல்வல்லான் ஆனந்தத் தாண்டவம் ஆடும் இக்காட்சி, பக்தர்களுக்கு முக்தியை நல்கும் பேரருள் வைபவமாகும்.

மார்கழி மாதத்தின் மகத்துவம்:

"மாதங்களில் நான் மார்கழி" என்று கண்ணன் கீதையில் சொன்னது போல, இது வழிபாட்டிற்குரிய புனித மாதம். தேவர்களுக்கு ஒரு நாள் என்பது மனிதர்களின் ஒரு வருடத்திற்குச் சமம். அந்த வகையில், தேவர்களின் வைகறைப் பொழுதாக (பிரம்ம முகூர்த்தம்) அமைவது மார்கழி மாதம். தேவர்கள் அதிகாலையில் எழுந்து ஈசனை வழிபடும் இந்தத் திருநாளில்தான் ஆருத்ரா தரிசனம் நிகழ்கிறது.

ஆருத்ரா - வானியலும் ஜோதிடமும் (ஓர் அரிய விளக்கம்):

வானியல் ரீதியாகப் பார்த்தால், விண்மீன்கள் என்பவை வானில் ஓரிடத்தில் நிலையாக இருப்பவை (Fixed Stars). அவை கோள்களைப் போல இடம் விட்டு இடம் நகர்வதில்லை என்பது அறிவியல் உண்மை. ஆனால், ஜோதிட சாஸ்திரம் என்பது நட்சத்திரங்களின் பௌதீக இருப்பை மட்டும் பார்க்காமல், அவற்றிலிருந்து வெளிப்படும் 'ஆற்றல்' (Energy) மற்றும் 'குணாதிசயம்' (Nature) ஆகியவற்றை அடிப்படையாகக் கொண்டது.

அந்த வகையில், சிவபெருமான்  பிறந்தநட்சத்திரமான 'திருவாதிரை' ஜோதிட சாஸ்திரத்தில் 'சரம்' (இயங்கிக் கொண்டே இருப்பது) என்ற வகையைச் சார்ந்தது. இது எப்படிச் சாத்தியம்?

1. காற்றின் தத்துவம் (வாயு தத்துவம்): திருவாதிரை நட்சத்திரம் மிதுன ராசியில் அமைகிறது. மிதுனம் என்பது 'காற்று ராசி'. காற்று ஓரிடத்தில் நிலையாக நிற்குமா? நிற்காது. எப்போதும் வீசிக் கொண்டும், அசைந்து கொண்டும் இருக்கும்.
2. ருத்திரனின் வடிவம்: திருவாதிரையின் அதிதேவதை ருத்திரன். இவன் புயல் மற்றும் சீற்றத்தின் வடிவம். அமைதியாகத் தெரியும் கடலுக்குள் அலைகள் ஓய்வதில்லை; நிலையாகத் தெரியும் அணுவுக்குள் எலக்ட்ரான்கள் சுழற்சி நிற்பதில்லை.
3. உள்ளிருக்கும் இயக்கம்: வானில் இந்த நட்சத்திரம் நிலையாகத் தெரிந்தாலும், அதிலிருந்து வெளிப்படும் கதிர்வீச்சு, மனித மனதையும் வாழ்வையும் நிலையாக இருக்க விடுவதில்லை. மாற்றங்களை உருவாக்கிக் கொண்டே இருக்கிறது.

எனவே, "புறத்தே நிலையாகத் தெரிந்தாலும், அகத்தே பெரும் இயக்கத்தைக் கொண்டது திருவாதிரை." இதுவே தில்லை நடராசரின் தத்துவம். சிலையாக நின்றாலும், அவரது நடனம் பிரபஞ்ச இயக்கத்தைக் குறிக்கிறது. இந்த சூட்சுமத்தை உணர்த்துவதே ஆருத்ரா தரிசனம்.

ஜோதிட ரீதியான கிரகச் சேர்க்கையும் பலன்களும்:

இந்தத் திருவாதிரைத் திருநாளில் வானில் நிகழும் கிரக நிலைகள் மனித வாழ்வை மேம்படுத்தும் வல்லமை கொண்டவை:

• சூரியன் - சந்திரன் பார்வை: மார்கழி மாதத்தில் சூரியன், குருவின் வீடான தனுசு ராசியில் (ஆன்மீக வீட்டில்) இருப்பார். சந்திரன், புதனின் வீடான மிதுன ராசியில் (திருவாதிரை நட்சத்திரத்தில்) இருப்பார். ஆத்ம காரகனான சூரியனும், மனோ காரகனான சந்திரனும் ஒருவரை ஒருவர் சமசப்தமமாகப் பார்த்துக் கொள்வது, மனிதனின் மனமும் ஆன்மாவும் இறை சிந்தனையில் ஒன்றிணைவதை உணர்த்துகிறது.

• ராகுவின் ஆதிக்கம் நீங்கும்: திருவாதிரை நட்சத்திரத்தின் அதிபதி 'ராகு'. ராகு என்பது ஆசை மற்றும் மாயையின் வடிவம். சிதம்பரத்தில் நடராசர் காலடியில் மிதிபட்டுக்கிடக்கும் முயலகனும் மாயையின் குறியீடு. ராகுவின் நட்சத்திரமான திருவாதிரையில் ஈசன் ஆடுகின்ற நடனம், நம்மைப் பீடித்திருக்கும் ராகு எனும் மாயையை (ஆசைகளை) மிதித்து, ஞானம் எனும் முக்தியை அருளுவதைக் குறிக்கிறது.

தில்லைத் திருவிழா நிகழ்வுகள்:

சிதம்பரத்தில் ஆருத்ரா தரிசன விழா பத்து நாட்கள் மிக விமரிசையாக நடைபெறும்.

1. தேரோட்டம்: விழாவின் ஒன்பதாம் நாள் அலங்கரிக்கப்பட்ட திருத்தேரில் நடராசப் பெருமானும், சிவகாமசுந்தரி அம்பாளும் வீதி உலா வருவார்கள்.

1. மகா அபிஷேகம்: பத்தாம் நாள் அதிகாலையில், ஆயிரங்கால் மண்டபத்தில் நடராசருக்குப் பால், தயிர், சந்தனம், விபூதி எனப் பலவகை திரவியங்களால் மகா அபிஷேகம் நடைபெறும்.

ஆனந்தத் தாண்டவ தரிசனம்:

அபிஷேகம் முடிந்த பிறகு, நடராசர் சிவகாமியோடு ராஜசபையில் இருந்து சிற்சபைக்கு எழுந்தருள்வார். அப்போது பல்லாயிரக்கணக்கான பக்தர்கள் "ஓம் நமச்சிவாய" என்று முழக்கமிட, மேள தாளங்கள் முழங்க, ஈசன் அசைந்தாடி காட்சி தருவார்.

நிலையாக நிற்கும் சிலையில், அர்ச்சகர்கள் தீபாராதனை காட்டும்போது ஏற்படும் ஒளியின் அசைவு, அந்தச் சிலையே நடனமாடுவது போன்ற தோற்றத்தை ஏற்படுத்தும். இதுவே ஆருத்ரா தரிசனம்.

திருவாதிரைக் களி - எளியோர்க்கு எளியோன்:

திருவாதிரை அன்று சிவபெருமானுக்கு 'களி' நிவேதனம் செய்வது வழக்கம். சேந்தனார் என்ற ஏழை பக்தர், தன்னிடம் இருந்த பழைய அரிசி மாவைக் கொண்டு களி செய்து படைக்க, அதனை ஈசன் விரும்பி உண்டார் என்ற வரலாறு, இறைவன் ஆடம்பரத்தை விட அன்பிற்கே அடிமை என்பதை உணர்த்துகிறது.

அறிவியல் ரீதியாக அணுக்களின் அசைவையும், ஜோதிட ரீதியாகக் கோள்களின் தாக்கத்தையும், ஆன்மீக ரீதியாக இறைவனின் கருணையையும் ஒருங்கே இணைக்கும் அற்புதப் பெருவிழா ஆருத்ரா தரிசனம்.

நம் வாழ்விலும், மனதிலும் உள்ள குழப்பங்கள் எனும் நிலையற்ற தன்மையை நீக்கி, நிலையான ஞானத்தைப் பெற, தில்லை அம்பலத்தானின் தூக்கிய திருவடியைச் சரணடைவோம்.

திருச்சிற்றம்பலம்.